Surja 29: Merimanga (El-'Ankebut)

[29:0] Në emër të Zotit, Mirëbërësit, të Mëshirshmit

[29:1] A. L. M.*

*29:1 Shih Shtojcën 1 për hollësirat e hartimit matematikor të Kuranit, dhe domethënien e këtyre Inicialeve Kuranore që në të kaluarën ishin misterioze.

Test patjetër

[29:2] A mendojnë njerëzit se ata do të lihen të thonë, “Besojmë,” pa u vënë në test?

[29:3] I kemi testuar ata para tyre, se Zoti duhet t’i shquaj ata që janë të sinqertë, dhe duhet t’i ekspozojë gënjeshtarët.

[29:4] A mendojnë ata që bëjnë mëkate që mund të na mashtrojnë? Vërtetë gabim është gjykimi i tyre.

[29:5] Kushdo që shpreson ta takojë Zotin, (duhet ta dijë që) një takim i tillë me Zotin do të vij patjetër. Ai është Dëgjuesi, i Gjithëdijshmi.

[29:6] Ata që përpiqen, përpiqen për të mirën e tyre. Zoti nuk ka nevojë për askënd.

[29:7] Ata që besojnë dhe çojnë jetë të drejtë, ne padyshim do t’ua heqim mëkatet, dhe padyshim do i shpërblejmë bujarisht për punët e tyre.

T’i nderosh prindërit e tu

[29:8] E urdhëruam qenien njerëzore t’i nderojë prindërit e vet. Por nëse mundohen të të detyrojnë të ngritësh idhuj përkrah Meje, mos iu bind atyre. Te Unë është kthimi juaj përfundimtar, pastaj do t’ju njoftoj për çdo gjë që kishit bërë.

[29:9] Ata që besojnë dhe çojnë jetë të drejtë, ne padyshim do i pranojmë me të drejtët.

Shokë për interes

[29:10] Mes njerëzve ka prej tyre që thonë, “Besojmë në Zotin,” por sapo të vuajnë ndonjë vështirësi për shkak të Zotit, ata e barazojnë keqtrajtimin e njerëzve me ndëshkimin e Zotit. Por nëse ndonjë bekim nga Zotëruesi yt vjen te ti, ata thonë, “Ne ishim me ju.” A nuk është Zoti tërësisht i vetëdijshëm për mendimet më të thella të njerëzve?

[29:11] Zoti patjetër do i shquaj ata që besojnë, dhe Ai patjetër do i ekspozojë hipokritët.

[29:12] Ata që nuk besuan iu thanë atyre që besuan, “Nëse ndiqni rrugën tonë, ne do të marrim përgjegjësinë për mëkatet tuaja.” Nuk është e vërtetë; ata nuk mund ta bartin asnjë mëkat të tyre. Ata janë gënjeshtarë.

[29:13] Në fakt, ata do i bartin mëkatet e veta, plus barrët e mëkateve të njerëzve të tjerë për të cilit ishin përgjegjës. Padyshim, ata do të pyeten në Ditën e Ringjalljes për pretendimet e tyre të rrejshme.

Nuhu

[29:14] E dërguam Nuhun te njerëzit e tij, dhe ai ndeji me ta njëmijë vjet, pa pesëdhjetë.* E ata vetëshkaktuan vërshimin për shkak të shkeljeve të tyre.

*29:14 Pasi që mrekullia e Kuranit është matematikore, numrat në veçanti përbëjnë një pjesë të rëndësishme të kodit të bazuar në 19. Kështu, numrat e përmendur në Kuran japin shumën 162146, ose 19x8534 (shih Shtojcën 1 për hollësirat).

[29:15] E shpëtuam atë dhe ata që e shoqëruan atë në arkë, dhe i ujdisëm si mësim për të gjithë njerëzit.

Ibrahimi

[29:16] Ibrahimi i tha njerëzve të tij, “Ta adhuroni Zotin, dhe t’ia keni dronë Atij. Kjo është më mirë për ju, veç sikur ta dinit.

Zoti: I vetmi burim i furnizimeve

[29:17] "Çka ju adhuroni në vend të Zotit janë idhuj të pafuqi; keni shpikur një gënjeshtër.” Idhujt që i adhuroni përkrah Zotit nuk kanë asnjë furnizim për ju. Prandaj, të kërkoni furnizime vetëm nga Zoti. Ta adhuroni vetëm Atë, dhe të jeni mirënjohës për Të; te Ai është kthimi juaj përfundimtar.

[29:18] Nëse nuk besoni, gjenerata para jush nuk kanë besuar gjithashtu. Funksioni i vetëm i të dërguarit është të japë (lajmin).

Studio prejardhjen e jetës*

[29:19] A nuk e kanë parë ata si Zoti e nisë krijimin, pastaj e përsërit? Kjo është lehtë për Zotin.

*29:19-20 Mësojmë nga Kurani që evolucioni është proces i udhëhequr hyjnisht. Shih Shtojcën 31 për hollësirat.

[29:20] Thuaj, “Enduni nëpër tokë dhe gjeni prejardhjen e jetës.”* Se Zoti kështu do të nisë krijimin në Përjetësi. Zoti është i Gjithëfuqishëm.

[29:21] Ai mallkon në ndëshkim këdo Ai vendosë, dhe derdhë mëshirën e Tij mbi këdo Ai do. Përfundimisht, te Ai do të dorëzoheni.

[29:22] Askush prej jush nuk mund të ikë prej këtyre fakteve, në tokë as në qiej, dhe nuk keni askënd përkrah Zotit si Zotërues dhe Sundues.

[29:23] Ata që nuk besojnë në shpalljet e Zotit, dhe në takimin me Të, kanë humbur shpresat nga mëshira Ime. Ata kanë vetëshkaktuar ndëshkim që dhemb.

Prapë te Ibrahimi

[29:24] Përgjigja e vetme nga njerëzit e tij ishte thënia e tyre, “Vritnie, ose digjnie.” Por Zoti e shpëtoi nga zjarri. Kjo duhet të japë mësim për njerëzit që besojnë.

Trysnia shoqërore: Katastrofë e thellë

[29:25] Ai tha, “Ju adhuroni përkrah Zotit idhuj të pafuqi për shkak të trysnisë shoqërore, vetëm sa për të ruajtur miqësinë mes jush në jetën e kësaj bote. Por pastaj, në Ditën e Ringjalljes, do të bëni hasha njëri tjetrin, dhe ta mallkoni njëri tjetrin. Përfundimi juaj është Ferri, ku nuk mund ta ndihmoni njëri tjetrin.”

[29:26] Luti besoi me të dhe tha, “Unë po emigroj te Zotëruesi im. Ai është i Plotfuqishmi, Më i Mençuri.”

[29:27] I dhamë atij Isakun dhe Jakobin, caktuam te pasardhësit e tij profetllëk dhe shkrimet, e pajisëm atë me shpërblimin e tij të duhur në këtë jetë, dhe në Përjetësi ai padyshim do të jetë me të drejtit.

Luti

[29:28] Luti i tha njerëzve të tij, “Ju bëni një neveri të tillë, askush në botë nuk e ka bërë më parë.

[29:29] "Ju praktikoni seks me burra, bëni plaçkitje rrugëve, dhe lejoni të gjitha llojet e veseve në shoqërinë tuaj.” Përgjigja e vetme nga njerëzit e tij ishte të thonë, “Sille te ne ndëshkimin e Zotit, nëse je i sinqertë.”

[29:30] Ai tha, “Zotëruesi im, më dhuro fitore kundër këtyre njerëzve shpirtligj.”

Engjëjt vizitojnë Ibrahimin dhe Lutin

[29:31] Kur të dërguarit tonë shkuan te Ibrahimi me lajm të mirë (për lindjen e Isakut), ata gjithashtu thanë, “Jemi rrugës për te asgjësimi i njerëzve të asaj qyteze (Sodomës), se njerëzit e saj kanë qenë shpirtligj.”

[29:32] Ai tha, “Por Luti po jeton atje.” Ata thanë, “Ne jemi tërësisht të vetëdijshëm për cilindo që jeton në të. Ne natyrisht që do e shpëtojmë atë dhe familjen e tij, përveç gruas së tij; ajo është e mallkuar.”

[29:33] Kur të dërguarit tonë arritën te vendi i Lutit, ata u keqtrajtuan, dhe ai u ngushtua nga prania e tyre. Por ata thanë, “Mos kij frikë, dhe mos u brengos. Ne do të të shpëtojmë ty dhe familjen tënde, përveç gruas tënde; ajo është e mallkuar.

[29:34] "Do të derdhim mbi njerëzit e kësaj qyteze katastrofë nga qielli, si pasojë e shpirtligësisë së tyre.”

[29:35] I lam të qëndrojnë disa prej gërmadhave të tyre, për të shërbyer si mësim i thellë për njerëzit që kuptojnë.

Shuajbi

[29:36] Në Medjen dërguam vëllanë e tyre Shuajbin. Ai tha, “O njerëzit e mi, ta adhuroni Zotin dhe kërkoni Ditën e Fundit, dhe mos u endni nëpër tokë të korruptuar.”

[29:37] Ata nuk i besuan atij dhe, si pasojë, tërmeti i asgjësoi ata; u lan të vdekur në shtëpitë e tyre në mëngjes.

[29:38] Ngjashëm, Adi dhe Themudi (u asgjësuan). Kjo është bërë e dukshme për ju nëpërmjet gërmadhave të tyre. Djalli kishte zbukuruar punët e tyre në sytë e tyre, dhe kishte larguar ata nga rruga, edhe pse ata kishin sy.

Sistemi i pandryshueshëm i Zotit

[29:39] Gjithashtu, Karuni, Faraoni, dhe Hamani; Moisiu shkoi te ta me shenja të qarta. Por ata vazhduan të kryejnë tirani në tokë. Si pasojë, ata nuk mundën t’i shmangen (ndëshkimit).

[29:40] Të gjithë ata mosbesimtarë u dënuan si pasojë e mëkateve të tyre. Disa prej tyre i asgjësuam me erëra të forta, disa u asgjësuan me tërmet, disa i bëmë që të gëlltiten nga toka, dhe disa i mbytëm. Zoti nuk është Ai që iu bëri keq atyre; janë ata që i bënë keq vetes.

Merimanga

[29:41] Alegoria e atyre që pranojnë sundues tjerë përkrah Zotit është si ajo e merimangës dhe shtëpisë së saj; shtëpia më e ligë është shtëpia e merimangës, veç sikur ta dinin.*

*29:41-43 Duhet një person i ditur për ta ditur që merimanga Vejusha e Zezë e vret bashkëshortin e saj. Përdorja e gjinisë femërore për t’iu referuar merimangës në 29:41 është pra e rëndësishme. Veç kësaj, rrjeta e merimangës është fizikisht shumë e dobët.

[29:42] Zoti e di shumë mirë që çfarëdo që ata adhurojnë përkrah Tij nuk janë asgjë në të vërtetë. Ai është i Plotfuqishmi, Më i Mençuri.

[29:43] I përmendim këta shembuj për njerëzit, dhe askush nuk i vlerëson ato përveç të dijshmëve.

[29:44] Zoti krijoi qiejt dhe tokën, me qëllim. Kjo furnizon provë të mjaftueshme për besimtarët.

Lutjet e Kontaktit (Salat)

[29:45] Të recitosh çka të është shpallur nga shkrimi, dhe zbato Lutjet e Kontaktit (Salat), se Lutjet e Kontaktit ndalojnë të këqija dhe vese. Por përkujtimi i Zotit (nëpërmjet Salatit) është synimi më i rëndësishëm.* Zoti di çfarëdo që bëni.

*29:45 Zotëruesi yt është kushdo që ta preokupon mendjen shumicën e kohës (shih 20:14 & Shtojcën 27).

Një Zot/ Një fe

[29:46] Mos argumentoni me njerëzit e shkrimit (Jahuditë, të Krishterët, dhe Myslimanët) përveç në mënyrën më të mirë të mundshme – në mos shkelshin – dhe thoni, “Ne besojmë në çka na është shpallur neve dhe çka u është shpallur juve, dhe zoti ynë dhe zoti juaj është një dhe i vetmi; Atij i nënshtrohemi.”

[29:47] E kemi shpallur te ti këtë shkrim, dhe ata të cilët i kemi bekuar me shkrimin paraprak do të besojnë në të. Gjithashtu, disa prej njerëzve të tu do të besojnë në të. Në të vërtetë, ata që shpërfillin shpalljet tona janë mosbesimtarët e vërtetë.

Kurani: Mrekullia e Muhamedit*

[29:48] Ti nuk i lexove shkrimet paraprake, as nuk i shkrove me dorën tënde. Në atë rast, refuzuesit do të kishin pasur arsye që të ushqejnë dyshime.

[29:49] Në fakt, këto shpallje janë të qarta në kraharorët e atyre që posedojnë dijeni. Vetëm shpirtligjtë do i shpërfillin shpalljet tona.

[29:50] Ata thanë, “Veç sikur një mrekulli* të mund t’i zbriste atij nga Zotëruesi i tij!” Thuaj, “Të gjitha mrekullitë vijnë vetëm nga Zoti; Unë nuk jam asgjë më shumë se një paralajmërues sqarues.”

*29:48-51 Ishte vullneti i Më të Mençurit që ta ndajë Kuranin nga mrekullia e tij mbresëlënëse matematikore për 1400 vjet. Duke e parë se si Myslimanët në përgjithësi e kanë idhujtarizuar Muhamedin, është e qartë që sikur mrekullia matematikore e Kuranit të ishte shpallur nëpërmjet Muhamedit gjithashtu, shumë njerëz do të kishin adhuruar atë si Zot të mishëruar. Ashtu siç ndodhi, Zoti deshi që mrekullia e madhe e Kuranit (74:30-35) të presë për kohën e kompjuterëve, dhe ta zbulojë atë nëpërmjet të Dërguarit të Tij të Besëlidhjes (shih Shtojcat 1, 2, & 26).

[29:51] A nuk është mjaft e mrekullueshme* që ne zbritëm te ti këtë libër, që po iu recitohet atyre? Kjo është në të vërtetë mëshirë dhe kujtesë për njerëzit që besojnë.

[29:52] Thuaj, “Zoti mjafton si dëshmitar mes meje dhe jush. Ai di çdo gjë në qiej dhe tokë. Padyshim, ata që besojnë në gënjeshtra dhe nuk besojnë në Zotin janë humbësit e vërtetë.”

Ata janë në Ferr

[29:53] Të sfidojnë ty që t’ua sjellësh ndëshkimin! Po të mos ishte për një kohë të paracaktuar, ndëshkimi do iu kishte ardhur atyre menjëherë.* Patjetër, do iu vij atyre papritmas, kur ata më së paku e presin.

*29:53 Kushdo që vdes para moshës 40 vjeçare shkon në Parajsë, dhe gjithkush nuk e meriton këtë. Njerëzit nganjëherë qahen për ngadalshmërinë e drejtësisë kur ndonjë kriminel i ligë nuk ekzekutohet me shpejtësi. Zoti e di kush meriton Parajsë (shih 46:15 dhe Shtojcën 32).

[29:54] Të sfidojnë ty të sjellësh ndëshkimin! Ferri tashmë i rrethon mosbesimtarët.

[29:55] Do të vij dita kur ndëshkimi i kaplon ata, nga lart tyre dhe nga poshtë këmbëve të tyre; Ai do të thotë, “Vuani pasojat e punëve tuaja.”

Imigro për Zotin

[29:56] O shërbëtorët e Mi që besuat, toka Ime është e gjerë, prandaj më adhuroni Mua.

[29:57] Çdokush do të shijojë vdekjen, pastaj te ne do të ktheheni përfundimisht.

[29:58] Ata që besojnë dhe çojnë jetë të drejtë, ne padyshim do i vëmë në Parajsë, me pallate dhe prroje që rrjedhin. Përgjithmonë qëndrojnë aty. Çfarë shpërblimi i bukur për punuesit.

[29:59] Ata janë ata që durojnë me këmbëngulje, dhe kanë besim në Zotëruesin e tyre.

[29:60] Për sa e sa krijesa që nuk i bartin furnizimet e veta, Zoti furnizon, si edhe për ju. Ai është Dëgjuesi, i Gjithëdijshmi.

Shumica e besimtarëve të paracaktuar për Ferr

[29:61] Nëse i pyet ata, “Kush krijoi qiejt dhe tokën, dhe vuri diellin dhe hënën në shërbimin tuaj,” ata do të thonë, “Zoti.” Pse atëherë ata devijuan?

[29:62] Zoti është Ai që e shton furnizimin për këdo që Ai zgjedhë nga mes krijesave të Tij, dhe e mbanë. Zoti është tërësisht i vetëdijshëm për të gjitha gjërat.

[29:63] Nëse i pyet ata, “Kush zbret nga qielli ujë, për të ngjallur tokë të vdekur,” ata do të thonë, “Zoti.” Thuaj, “Lavdi Zotit.” Shumica e tyre nuk kuptojnë.

Rirregullo prioritetet tua

[29:64] Jeta e kësaj bote nuk është asgjë më shumë se kotësi dhe lojë, përderisa vendbanimi i Përjetësisë është jeta e vërtetë, veç sikur ta dinin.

[29:65] Kur udhëtojnë mbi një anije, ata i luten Zotit, duke ia kushtuar lutjet e tyre Atij. Por sapo Ai t’i shpëtojë ata te bregu, ata i kthehen idhujtarisë.

[29:66] Lëri të mos besojnë në çka iu kemi dhënë atyre, dhe lëri le të kënaqen përkohësisht; ata padyshim do e marrin vesh.

[29:67] A nuk e kanë parë që ne kemi themeluar një Strehimore të Shenjtë që e bëmë të sigurt, përderisa përreth tyre njerëzit janë në rrezik të vazhdueshëm? A do të besojnë ende në gënjeshtër, dhe të refuzojnë bekimet e Zotit?

[29:68] Kush është më i keq se ai që trillon rrena dhe ia mveshë ato Zotit, ose refuzon të vërtetën kur i vjen atij? A nuk është Ferri ndëshkimi i drejtë për mosbesimtarët?

[29:69] Sa për ata që përpiqen në rrugën tonë, ne patjetër do i udhëzojmë në rrugët tona. Padyshim, Zoti është me besimtarët.